Sobro’l podcast
Nuna Asturies menguante, onde la bioloxía pesa tantu o más que les dinámiques socioeconómiques, pruye una reflexón continua del nós, del qué somos y, sobre tou, del qué queremos ser. Nesi alderique d’identidaes surde la necesidá d’atopar finxos dende onde texer les redes que componen el tapiz de lo que somos.
Con esti podcast queremos averanos al distritu Este de Xixón, concretamente al barriu de Ciares, nesi intentu por entender de qué se compón esi nós, poniendo la llupa nun de los barrios obreros de la ciudá y que trabaya por atopar y caltener la so identidá nun mundu cada vez más cambiante. Un cachín de mundu de malapenes 16.000 habitantes que configura en sí mesmu una realidá propia.
Un percorríu sonoru al traviés del tiempo, del espaciu y de les persones que día tres día faen por dar vida y ameyorar el so barriu.
Capítulos
Prólogu – Cróniques d’un barriu
Esti podcast va estructurase en capítulos individuales, caún dedicáu a un aspectu de la historia o vida nel barriu, col asturianu como llingua vehicular y usando’l propiu barriu como filu conductor de les narraciones y averar al oyente al barriu dende diferentes prismes.